Presentación da Feira de San Isidro da Milagrosa LAURA LEIRAS
A Asociación de Veciños, Comerciantes e Industriais da Milagrosa presentou o programa da popular celebración, que terá lugar os días 24, 25 e 26
20 may 2024 . Actualizado a las 13:50 h.
Lugo prepárase para celebrar a súa gran feira: a de Produtos do Campo e Artesanía da Milagrosa, que terá lugar os días 24, 25 e 26 e que contará con máis verbenas e cunha degustación gratuíta de becerro ao espeto.
O salón de plenos do Concello de Lugo acolleu este luns a presentación da vixésimo cuarta edición da Feira de Produtos do Campo e Artesanía, que se celebrará na Praza da Milagrosa entre o 24 e o 26 e que reunirá a uns trinta expositores de toda Galicia e tamén de Asturias e León. Unha cita da que a alcaldesa de Lugo, Paula Alvarellos, destacou «a súa aposta polo autóctono e por dar visibilidade aos produtos do noso sector primario».
O evento, organizado pola Asociación de Veciños, Comerciantes e Industriais da Milagrosa, contará este ano con varias novidades, grazas á colaboración do Concello, que leva apoiando desde os seus comezos a celebración desta cita. Neste sentido, Alvarellos asegurou que «un ano máis, demostrará o seu poder de convocatoria porque, ademais de ser unha festa que porá en valor os nosos produtos autóctonos e as creacións artesás, trátase dunha das feiras urbanas máis importantes de Galicia».
A alcaldesa de Lugo fixo fincapé no importante poder de convocatoria deste barrio, polo que se mostrou convencida de que «durante estes tres días a praza da Milagrosa converterase nun auténtico escaparate dos produtos de máis calidade e sona do noso sector primario, servindo ao mesmo tempo de dinamizador para o resto do barrio e da cidade». Alvarellos aproveitou a presencia de preto de trinta integrantes deste colectivo que asistiron á presentación para «agradecer a vosa implicación e traballo na organización dunha cita xa consolidada no calendario festivo de gran parte da veciñanza lucense».
Novidades do programa
Pola súa banda, o presidente da citada asociación, Jesús Vázquez, sinalou que «entre as novidades do programa desta edición, destacan máis actuacións musicais e verbenas, ademais dunha degustación gratuíta de becerro ao espeto, na que está previsto repartir máis de 2.500 racións e que é posible grazas á doazón particular de César Dorado, presidente da Asociación de Criadores de Raza Rubia Gallega».
Xunto a un gran número de veciños e veciñas do colectivo organizador, ao acto de presentación asistiron o presidente e o secretario da asociación, Jesús Vázquez e Luis Abel, respectivamente; o presidente de Acruga, César Dorado; e o deputado da área de Formación, Ensino e Economía do Coñecemento, Miguel Fernández, en representación da Deputación, institución que tamén colabora dun xeito moi activo coa celebración desta feira.
FUENTE: LA VOZ DE GALICIA 20/05/2024
Federación de Asociaciones de Vecinos de Lugo 